مشهد

_ وكانوا بيسألوني عن الحُب .. ومعرفتش ارد .
_ طب ليه ..؟
_ عشان مش عارفة ..
_ بجد ..!
_ كل اللى سمعته منهم .. تقولى لمسته بتدوخك .. نظرته بس بتطمنك .. واللى تقول الحُب إنك ترضي بيه جوا بيتك وتقولى هو وبس، والباقى اللى قال مبقاش شايف غيرها قُدامى .. ابقى حاسس انها ام عيالى .. فلو ده الحٌب فانا مش بَحِبْ ..
_ امممم .. اومال ده تسميه ايه ؟
_ مصلحة ..!
_ ازاى ..
_ بتحبه عشان لمسة بتحسسها احساس مختلف .. ولا نظرة عشان متخافش ولا جوازة والسلام او واحدة حركت غرايزه فهوب بقت حبيبته .. واللى بينقى واحدة بالميزان عشان تربي سُلالة العيلة ..
_ الحُب ايه طيب ..؟
_ الحُب إني احس بلمستك من قبل متلمسنى واحس اد ايه حُضنك دافي من غير مقرب ليك .. او ان يومى يتكعبل ويبقى فقري عشان بس متقابلناش الصُبح .. يعنى القهوة تبقى مُرة عشان مكنتش معايا وانا بشربها .. يعنى الخناق اللي بيدور بينا وبيختفى لما بنبتسم لبعض لما يطول النظر بينا .. الحُب إنى معرفش اقول ايه السبب إنى بحبك اول محد يقولى السؤال فى وشي .. اصل الحُب جوانا .. شوية ذبذبات بتخلي قلبك يرقص واعصابك تسيب .. ومش سهل تترجم بشوية كلمات ..
* بتحرك ايديها قدام وشه *
_ تُهت مني فين ..؟
_ بسمعك ..
_ طب فهمت حاجة ..؟
_ فهمت إني فعلاً عاشقك بطريقتك ..~