هروب بطريقة اخرى

عايزة أهرب منك ..
وارجع جمبك بليل ..
ادفا فيك او استخبى ..
يجي النهار اكون مشيت ..
ادوب في تفاصيل النهار ..
الشُغل، الطبخ، التسكع في الشوارع ..
اتصل بيك في نص اليوم ..
كلمتين بالظبط واقفل التليفون بعديها ..
اهرب منك وافضل جمبك ..
ولما يجي الليل ارجع جمبك ..
مش عارفة انت فاهمني ولا لا ..
بس حاول تحس إن الكلام عنك ..~

بعبعة نُص الليل

*بتعيط في الشارع ..
الدنيا بتشتي ..
تليفونها بيرن ..
رقم زميلتها في الشغل ..
بترد ..
_ الوو ..
_ ايه يا بنتي فينك ..؟
_ موجودة 
_ ايه ده مال صوتك ؟
_ لا مافيش .. بردانة شوية ..
_ اه .. ولو اني مش مرتاحة 
بس سلامتك ..
_ انتي فين ؟
_ انا في البيت يعني حكون فين ..
_ ممكن اجيلك ..
_ طبعاً تعالي ..
اكتبي العنوان عندك ..
* بعد ربع ساعة
الجرس بيرن ..
بتفتح الباب ..
بتلاقيها بتعيط ..
وتدخل في حضنها من غير كلام ..
بتحسس على شعرها ..
_ ايه ده في ايه ؟
* بيفضلوا واقفين شوية من غير ولا كلمة ..
صوت المزيكا شغالة فى الشقة ..
والمطر صوته جامد على الازاز ..
بيقطع الصمت ..
_ انا آسفة .. بس مخنوقة وجيتى فى طريقي * بتمسح دموعها من على خدها*
_ بلا اسفة بلا بتاع خشى اعدى ..
سبينى اعملك قهوة ونتكلم سوا ..
وكلمي طنط قوليلها حتقعدي معايا انهارده ..
حتقعدي تبُصيلي كتير ..
يلا على ما اخلص القهوة ..
* بعد شوية ..
بتيجي بفنجانين قهوة باللبن ..
_ أمسكي فنجانك اهو ..
احكيلي مالك ..
من غير لا مفيش ..
ولا مخنوقة ..
_ مش عارفة ..
بس صوت جوايا عمال ينادي
مش عارفة على مين ولا بينادي ليه ..
انا لا بحب ولا عايزة احب
بس اللى جوايا حساه زي ميكون عشقت راجل مبيجيش بعديه
واتخانت من اعز صاحبة ليا ..
حتى معرفش ايه القصة دي 
بس متهيألي ده اكبر وجع ممكن يحصل للست !
مش عارفة ..
_ عارفة عنيكي بتقول ايه ؟
_ ايه ..؟
_بتقول إنك شايلة حمل جواكى اتقل من وزنك .. تعبك ومش لاقية حد يشيله معاكى مداريه عليه وبياكل من صحتك ..
بيطفي لمعة عينك اللي زي الاطفال دي ..
ومانعك تعيشي بحُرية ..
محجمك، وساجنك جواه ..
_ انتي ازاي بتقولي كده ..؟
_ مش عارفة ..
بس ديماً العياط عندي بيفتحلي باب جوا البني آدم ..
ده غير إني بحسك صحبتي رغم معرفتنا السطحية ..
_ انا تعبانة .. ومش عارفة من ايه 
بس يومين وحبقى زي الفُل ..
_ اكبر كدبة ممكن نضحك بيها على روحنا ..
عارفة ليه ؟
_ ليه ..؟
_ عشان إحنا عمرنا ما بنتجاهل اللي بيدايقنا إحنا بنتشغل عنه ..
وبنسيبه يعلم جوانا ..
بننشغل او بنحاول نبين اننا مشغولين عنه ..
وفجأة نحس بخنقة ملهاش سبب ولا تفسير 
وتلاقينا مرة على مرة ..
بننزوي لوحدنا ..
بنتعب ونبقى مش عارفين نقول ايه ولا ايه ..
_ انا حاسة إنك بتعريني من جوا ..
_ إحنا اتولدنا عريانين ..
وحنتبعث على نفس الوضع ..
وبنختار نبقى عريانين قدام ناس مُعينة ..
سواء بجسمك او بروحك ..
وسعات الظروف بتخلينا نعري اللي جوانا 
ومن بعدها نبدأ نلبس توب جديد لحياتنا ..
_ انا عايزة اشرب سيجارة ..
_ قومي عندك هناك جمب التليفزيون ..
*بتقوم تروح نحية التليفزيون
وبتبصلها ..
_ انتى انحرفتي وبقيتي تدخني ؟
_ اتلمي يا حبيبتي ..
انا كُنت واخداها من جيب الجاكت بتاعه
لآخر مرة كان عندي هنا ..
قُلت حيرجع ياخدها ومرجعش كعادته ..
*بتقوم تقف قدام الشباك ..
بتيجي جمبها ..
_ اممم قولتيلي ..
_ لا متغمزيش كده ..
لأنه اكبر وجع في حياتي دلوقتي ..
خلينا نخلص منك انتى الاول ..
وحبعبعلك بالي جوايا بعدين ..~
* بيوقفوا يسمعوا صوت المطر ..
واحدة بتشرب القهوة ..
والتانية سارحة مع دُخانها ..
بيحاولوا يلاقوا نقطة خروج ..
او بيدوروا على توب جديد لحياة جديدة ..

على القهوة

قاعدة فى القهوة  ..
اول مرة تاخد خطوة زي دي ..
بتحاول تتعود على الوحدة ..
بتسمع اغاني بصوت عالى فى ودنها ..
بتتفرج على الناس حواليها ..
بتطلب رقمه ..
مبيردش كالعادة ..
بيلفت نظرها اتنين قاعدين ..
بنت جميلة بشعر طويل وولد لايق عليها ..
البنت ماسكة الفنجان وبتقراه وهو بيضحك ..
البنت بتشاور على حاجة جوا الفنجان وبتبتسم ..
المشهد حلو لدرجة خلاها تبتسم زيهم ..
بيقطعه صوت التليفون بتاعها بيرن ..
واسمه بيطلع على التليفون ..
بترد بسرعة .. 
_ الو ..
_ اسف كُنت فى اجتماع ..
_ انا قاعدة لوحدي ..
_ فين ..؟
_ على القهوة اللي عرفتني عليها ..
_ وليه ..؟
_ مش لاقيه حاجة اعملها ..
بسمع مزيكا ..
بتفرج على الناس ..
واه .. قصيت شعري ..
تعالا شوفوا ..
_ مبحبش الشعر القصير ..
_ ده شعري على فكرة مش شعرك ..!
_ اومال عيزاني اشوفه ليه ؟
مش عشان اقول رأي !
_ لا عشان عايزة اشوفك ومش لاقية حجة ..
_ وهو انتى محتاجة حجة عشان تشوفينى ؟
_ اه ..
_ اممم ..
_ جي ؟
_ لأ ..
_ سخيف ماشي ؟
_ ماشي ..
وراكي ايه بليل ؟
_ انت مالك ..
_ خلاص انا غلطان ..
كُنت حقولك تنزلي معايا اشتري حاجات ..
_ امممم .. موافقة بس بشروطي ..
_ شروط كمان ؟
_ اسمع ممكن ؟
_ ممكن قولي ..
_ بص يا سيدي 
انا حقوم دلوقت اروح اجيب سمك عشان نفسي فيه
وحعمل بابا غنوج بتحبه ؟
_ بابا غنوج ايه دلوقت ..
_ رد وبطل لماضة 
_ حاضر
_ حاضر ايه بقولك رد بتحبه ؟
_ اه بحبه ..
_ ماشى ..
حتسوق واطبخ واسمع الاغانى اللى ادتهالى على الفلاشة
ولو وحشة حعاقبك لما اشوفك ..
_ هههههه حتعاقبيني ازاى ؟
_ العقاب مبيتقالش يا بابا
_ طب حنتقابل 7 كويس ؟
_ ونروح 10 كويس ؟
_ متفقين ..
_ استنى قبل متقفل ..
_ عايزة ايه ..؟
_ قولي إنى وحشتك ..
_ ولو قولتها بعد ما طلبتيها حتتبسطي ؟
_ عشان نبرة صوتك وتنهيدتك بتقولها ..
وانا عايزة اسمعها ..
ممكن تريحني بقه ..؟
_ لما اشوفك ..
_ طب مش قافلة بقه هاه ..
_ يابنتي اكبري شوية ..
_ خلصت ؟
_ خلصت ايه ؟
_ كلامك ..
_ اه ..
_ طب قول بقه ..
بجد عايزة اسمعها ..
يلا عشان حتأخر هاه ..
وكل ده من وقت حضرتك ..
_ عارفة برغم زنك وقرفك والدوشة اللي بتعمليها ..
إلا إني بحبك كده ..
بجنانك وكلامك الغريب وطلباتك اللى مش بتيجي على بالى إنك تقوليها ..
هو انتى جيالي منين وليه ..
_ بلا منين بلا ليه ..
كلامك حلو يا اسمك ايه ..
_ اسمك ايه ..
ماشاء الله خايفة تتلغبطي فـأسمي فبتقولى كده وخلاص
_ تصدق انا كلبة إني بكلمك ..
امشي يلا روح اشوفك الساعة سابعة ..
رجالة تجيب الهم ..
_ وحشتني عصبيتك ..
_ *بتضحك* خليتك تقولها ..
إن كيدهن عظيم ..
*بيقفل السكة ..
بتمشي فرحانة ..
بتستعد للمغامرة جوا السوق ..
وللقاء الساعة 7 ..*

حُضن فاضي

*قاعدة على الارض بقالها يومين وضو الشمس مدخلش شقتها ..
بتشرب سجاير ..
شعرها منكوش ..
لابسة فُستان ابيض قُصير ..
وقصة شعرها "كاريه" ..
بتسمع مزيكا هادية عكس اللي جواها ..
مش يمكن تهدا شبه المزيكا بالتكرار ..؟
يبدأ المشهد والباب بيخبط ..
بتحاول تتجاهل الصوت بعد ما بتبص على الباب ..
بيخبط تاني ..
بتقوم وتبص فى "العين السحرية"
بتمد ايدها فى شعرها تعدله ..
تتردد ..
فتفتح الباب بفوضويتها ..
_ كُنت عارفة ان حيجي يوم وترجع ..
_ عاملة ايه ..
*بتبص لرجلها ..
_ حافية وقاعدة فى البيت، مغيرتش لبسي من يومين، مباكولش على عكس العادة، اممم وتقريباً النوم مفارقني، متعرفش ليه والنبي ؟ *بتضحك ..* مش يمكن زعلته وانا مش واخدة بالي ..؟
_ حفضل واقف على الباب كتير ..؟
_ لا طبعاً ازاااي .. *بتفتح الباب للأخر وبتقف جمبه عشان توسع مكان*
اتفضل يا استاذ *بتقول اسمه* 
*بيدخل ..
بتقفل الباب ..*
_ مش متعود اشوفك كده .. وايه ده انتى شربتي سجاير ..؟!!
_ اممم اه .. بقلدك ممكن ..
مش لما سألتك عنها آخر مرة قولتلي بتريحني
فقلت اجرب وسيلة من وسائل راحتك الشاقة ..
او يمكن بعذب نفسي ..!
_ بس انتى مش كده ..!
_ ايوااا .. اديك قولتها اهو ..
لما انا مش كده ..
قربت ليه ؟
دخلت ليه شقتي ؟
_ وهو انا عشان اقرب ليكي لازم تبقى بتشربي سجاير ..
_ ميبقاش مُخك ضِلم كده، او تعمل نفسك مش فاهم ..
* بيبصوا لبعض ..
بتروح عند المرآية اللى جمب الباب ..*
_ آسفة شكلي وحش ..
*بتحط روج احمر ..*
عارف حاطة الروج ده جمب الباب ليه ؟
اممم حقولك ..
عشان وانا نازلة ببص لنفسي قبل منزل اشوفك
ولازم اكون مختلفة لما اقابلك عكس اللى بيشوفوني بفوضويتي ..
ومش من عادتي احط الروج ..
فعشان منساش ابص لنفسي قبل مفتح الباب احطه وانزل على طول ..
امممم *بتكسر الروج*
عارفة بكسرله ليه دلوقت ..؟
حقولك ..
عشان مش ناوية اشوفك تاني ..
_ حصل ايه لكل ده ..؟
_ ايه ده انت بتسأل اهو ..
انا قلت عليك فقدت النطق من شكلي ..
_ امشي ؟
_ لأ استنى .. *بتقف قدامه*
كان فى واحدة صحبتى قالتلى ان الحُضن بيخفف الوجع ..
وانا موجوعة ..
حبيتك ..
حلمت بيك ..
ورسمتك كتير ..
حتى ادخل الاوضة واتفرج على نفسك بكل الحالات ..
فاااه .. ممكن تحضني ؟
_ ممكن .. *بيقرب ..*
*بتتكلم وهي فى حضنه ..
_ زي ما الوجع كُله بسببك ..
لازم تعالجني ..
قُلت العلاج يمكن حضنك ..
ويسحب مني اللى شيلاه جوايا كُله من نحيتك ..
بس المشكلة إني جواك مش حاسة بحاجة ..
غير إني عايزة اعيط ومطلعش ..
*بتطلع من حضنه ..
بتبصله ..
_ عندك تفسير لحالتي دي ..؟

ضوء الشمس

إحجبوا عنا ضوء الشمس، فعيني يُصيبها الوجع ..
ولا احتاج لدفئها بعدما إلتقيت به ..
ولكن بداخلي يَطلُب منك ان ..
تَضُمَني إليك في لحظات البرد ..
في لحظات الضعف و الإنكسار ..
حتى اشعر إنك هُنا ..
ثُم ..
خُذ بيدي إلي عالمك المُخيف ..
ودعني اتقاسم معك الهموم ..
واحقق معك تلك الأُمنيات التي دونتها لك في ذاك النص الذى تُفضله ..
ان تأتي إلي منزلي وأعدك أن أكُف عن الثرثرة ..
ولكني سأترك لعيني المجال لتتفحصك، لتحتضنك من تلك المسافة ..
التى وضعتها انا حتى تَشعُر انت بالراحة ..
ان أُحضر لك الشوربة الساخنة لتكون بخير ..
وأسرق السجائر من جيب معطفك الذى خلعته بجوار الباب ..
حتى لا تُنفث بها ما يُزعجك ..
وافكر في فعل شيئاً آخر ..
كالجلوس على الارض امام النافذة ننظر للسماء ..
ونستمع للهذا الراديو العتيق معاً ..
فيصدر هذا الرجل بصوته الاجش كلمات قَديمة ..
فنضحك معاً لنكسر حاجز الصمت ..
فتقترب من ذراعي وتضع رأسك به لحين ان تُشرق الشمس من جديد ..
لهذا احجبوا عنا ضوء الشمس الآن ..~

زي دُخان سيجارتك

بين اعقاب سجايرك ..
وفي وسط الكراكيب ..
آخر واحدة في الصورة اللى بتعشقها ..
هادية زى اول المزيكا قبل مَتعلا ..
هي اللى بتتخنق من ريحة السجاير ..
ومن حُبك ليها إتعايشت معاه ..
هي اللي لسه بتستناك آخر الليل ..
رغم إنها عارفة إن مكانك مش جمبها ..
هي اللي لسه بتشيل جوابتها ليك ..
وبتمنع نفسها عن حُضنك ..
مش خوف منك ..
بس خوف عليك الا تتحرق من الدفا ..
انت عايش على البرودة رغم دفا جسمك ..
الوحدة باردة عكس حرارة المدينة اللى عايشين فيها ..
نظامك ثُم شغلك ثم نفسك المهلوكة معاك ..
مش ده كان كلامك ليها من الاول ..
تفرض حُضنها عليك ازاي وهي بتحترم خطوطك ..؟
لساه الامل صاحي ..
تنام فى حضنك آخر الليل ..
تشرب القهوة الصُبح معاك ..
وتلم كراكيبك وورقها من على الارض اللى بايت من بليل ..
وتشيل اعقاب السجاير من الطبق ..
عشان لما تيجي الليلة اللى بعديها ..
متخرجش للهوا تنفخ دُخانك ..~

اللاعلاقة

_ هو انا ممكن اتكلم ؟
_ طبعا ..!
_ المرة دي مش زي كُل مرة، عارفة ان الوقت قصير قوي، بس انا محتاجة اقول اللي جوايا ..
*بيبصلها وعنيه كلها استفهام*
_ مش فاهم ..
_ اول حاجة بلاش تقاطعني عشان اعرف اكُر كُل اللي جوايا من غير تردد
_ حاضر حسكت
_ عرفتك في فترة صغيرة جدا .. وعنيا لمعت زي ما بيقولوا اول ما شوفتك كام مرة .. وبعدين بقيت بسمع الاغانى اللى بقالى سنين بسمعها وبقيت بشوفك معايا فيها .. غير كل ده .. خدت خطوة وكلمتك ..
_ كملي ..
_ انا المود بتاعي بقه بيتأثر بيك .. بزعل لزعلك .. وبيتشغل بالي عليك .. وكمان فوق كل ده طول اليوم فى دماغى ومش عايزة اسيب الموبيل واستني رسالتك .. زى اللى قاعد جمب الباب مستني الضيف اللى جايله ..
_ امممم ..
_ لو الحُب إنى استنى اشوفك امتى واستنى رسايلك حتى لو بتقولى " صباح الخير" او لو الحُب إني احس انى بقيت حلوة من يوم ما عرفتك .. واحاول اعمل اى حاجة عشان اوصلك فانا غالبا بحبك .. مش عارفة ردك ايه بس انا اتخنقت ..
اتخنقت من الوجع والامل الكداب وكلمة صحبتى اللى قالتلى انتى حاطة نفسك فى نقطة اسمها " اللا علاقة" .. حسيت ان مش فارق بقه اى حاجة ..
يا تقولي مُستعد تقرب ونجرب سوا نبقى مع بعض ..
يا تبعد وتروح ..
انا مش بطلب منك القُرب ..
بس محتاجة اعرف انا زي زي اى واحدة من صُحابك ولا انا ايه فى حياتك ..؟
_ * باصص فى الارض بيحاول يجمع الكلام ..
يرفع عينيه يبصلها ..
_ انا مش عارف ليه قلبي واجعني عليكي كده ..
_ اممم .. عامةً انا اسفة
* بتلم حاجتها ..
_ انتى حتمشي ؟
_ اظن مليش مكان بقه ..
_ بس انتي معرفتيش ردي ..
_ حتقول ايه ؟
_ انا قلبي وجعني ومعرفش ليه ..
كُل اللي عرفه إني حقيقي محتاج اقرب منك وافضل معاكي ..
فاهمة حاجة ..؟
_ عايزة اكُل كُشري ..
_ نعم ياختي ..؟
_ جعانة بقولك ..
_ انا ماشي ..
_ استني طيب .. الراجل مش بعيد
* بتجري وراه على السلم

أوضة على السطوح

*بتتصل بيه ..*
_ الووو
_ كُل ده عشان ترد عليا ..؟
_ كُنت نايم ..
_ طب اتشطف وتعالا ..
_ اجي فين ..؟
_ الاوضة بتاعتي .. اخيراً خلصتها 
_ اخيراً حتجبيني ..
_ اه وبطل رغي عشان ورايا حاجات كتير حعملها لحد متوصل .. يلا سلام متتأخرش ..
_ استني .. انا معرفش العنوان
_ والله ؟ ده اللى هو ازاى ؟
_ نسيتي انك مرضتيش تقوليلي عشان مجلكيش فجأة قبل متخلصيها ..
_ اااااه .. معلش نسيت .. بص يا سيدي *بتقول العنوان*
بعد ساعة ..
*الباب بيخبط .. بتفتح*
_ السلم صعب جداً
_ صعب ايه ده بيت قديم يعنى سلالم مُريحة وترابزين مُدهش
_ مُدهش .. طب اوعي دخليني
*بتوقفه بإيديها*
_ حيلك حيلك .. بالسهولة دي ؟
_ اومال حدخل على طراطيف صوابعي مثلاً ..؟
_ هيهيهيهي .. بطل هاه، غمض عينيك
_ ليه بقه ..
_ اسمع الكلام يلا .. الاكل حيبرد جوا
*بيغمض عينيه*
_ اهو
_ هات ايديك
*بيفتح*
_ وده ليه بقه
_ يادي النيلة .. فتحت ليه انت دلوقت هاه ؟
اتفضل غمض وهات ايدك وبسرعة
_ اهو وخدي ايدي
*بتمسك ايده وبتمشي وهو معاها*
_ خدي بالك الا توقعيني .. انا عارفك تايهة
_ متخفش واسكت شوية
*بتوقفه فى نص الاوضة ..
بتسيب ايده*
_ فتح يلا ..
*بيبص حواليه*
_ الله .. ايه ده !
_ احيه مكنتش عارفة انها حتعجبك كده ..
_ كُل ده عشان قولت الله ؟
_ لا عشان عينيك بتلمع ..
*بيبتسم*
_ وعشان ابتسامتك دي ..
_ الاوضة حلوة عشان بتاعتك وذوقك ..
وعشان انتي بتبصيلي دلوقت من غير متتكسفي ..
_ الاوضة حلوة عشان انت جيت ..
رديت فيها الروح ..
_ ممكن ابات عندك ..؟
_ ايه الطمع ده .. وبعدين هى مرتبة واحدة
_ حنام جمبك ..
_ يا سلاااام .. والله ؟
_ طب انا جعان ..
_ يلا قُدامي .. عملالك اكل بتحبه
*واقف مكانه هو*
_ ايه مش حتيجي ؟
_ لا خديني من ايدي لحد هناك
*بتبتسمله ..
بتاخد ايده ..
ويروحوا ..

لو كُنا في عالم آخر

لو كُنا في عالم آخر ..
لجعلت منزلك بجوار منزلي ..
لنتقابل على السلم ونتحدث فى المساء من خلال الشُرفة المُلتصقة عندما تنام أمي ..
اصنع لك الكاكاو الساخن باللبن ونقف ننظر إلى هذا الرجل العائد من العمل ويحمل عشاء فاخر لزوجته ..
وتُخبرني إنه زوج مصري اصيل يفعل هذا لانه في بداية الزواج ..
فأبتسم عليه وعلى حديثك ..
كُنت سأهرب خجلاً من نظراتك واقرأ عليك نصوصي ..
وتُصلح لي اخطائي اللغوية ..
كُنت سأتقرب إلي امك ..
حتى تُرشحني زوجة لك ..
رغم رفضك لهذا ..
ولكن من اجل شعوري بالسلام إن لن تأتي اخرى تراها مُناسبة اكثر ..
كُنت سأرتب يوماً مُميزاً قبل العطلة الاسبوعية لنقضيه سوياً ..
لنلعب، نُغني، وربما لتُعلمني الرقص ..
لو كُنا في عالم آخر ..
لشعرت بالتوازن ..
لبَعدت الخوف من الوحدة من دليل حياتي ..
لتناسيت الهاتف ..
لزهدت التكنولوجيا واعتمدت على عينيك والاوراق المُبعثرة فى الشرفة المُلحقة بغُرفتك التى ادونها والقيها لك لتراها في الصباح ..~
لو كُنا في عالم آخر ..
لأحتضنتك وغفوت في سلام ..

لحظة معك .. "مشهد 4 "

_ إياك تتعشم فيا .. وتقول عمرها متروح ..
_ بطلت اظن الكويس ..
_ وانا بطلت اوعد الناس بالبقاء، بالذات انت ..
_ واشمعنا بقه ..؟
_ المضمون مرفوض او مش مرغوب .. وانا عايزة ابقالك رغبة ابقالك حياة، عالم، او حتى نقطة هروب من الوحدة للناس ..
_ امتى حتمّلّي حياتي ..؟
_ طول مانا بتنفس مش حَمِلّ من وجودك ..
_ وايه مخليكي واثقة كده ..؟
_ مش واثقة على اد مانا حاسة، زي مانا قدامك دلوقت ..
_ حاسة بأيه ..؟
_ اني عايزة اجي جمبك على الارض هنا ..
* بيضحك *
_ وايه مانعك ..؟
_ إنك مطلبتش مني اقرب ..
_ لو مش طالب قُربك مكنش زمانك هنا، ولا كان زمانا بنتكلم ..
_ بطل فلسفة وقولي تعالي اقعدي جمبي ..
_ ماشي يا ستي .. تعالي 
* بتنزل تقعد جمبه*
_ لما بكون جمبك كده بحس بالحُرية .. بحس بحركاتك التلقائية لكلامك اللي داير جواك، بحس بروحي اللى ساكناك، بحس بإستغرابك لنفسك إنك قَربت من بنت ..~
_ مش سهل حد يفهمني ..
_ ومش صعب احس بيك ..
_ الاحساس مش ديماً صح ..!
_ ولو اللي بينا وحاسين بيه مش لاقين ليه سبب يبقى صادق ..
الست مننا بتحس بالراجل اللى بيحبها ..
واللي تعشق حد زيك متملكش في ايدها غير إنها تحس ..
_ عايزة ايه انتى دلوقتي مني ..؟
_ اشمعنا ..
_ معرفش ..
_ ولا بتهرب ..؟
_ انا مش زيك * بيضحك*
_ عيزاك تحط ايدك على كتفي وتقربني لصدرك زي الافلام 
*بيضحك*
_ واشغلك قرب كمان بقه وكده
*بتبصله جامد*
_ مبهزرش ..
_ طيب خلاص تعالي ..
* سكوت .. مفيش صوت غير صوت النفس اللى طالع منهم*
_ عارف نفسي فى ايه دلوقت ..؟
_ ايه ..؟
_ نموت  ..!

مشهد 3

_ تقدر تقول انى وصلت لدرجة من التوقع لاى حاجة بتحصل حواليا .. يعنى بقيت زى رد الفعل لأى تصرف، اخترت البُعد فتعالا وقول وانا حنسحب .. قرت تقرب فتعالا انا فتحالك درعاتى الاتنين ..
_ مقدرش اسيبك ..
_ مش طالبة منك غير البقاء، زى ما بتتواجد فى شغلك، اتواجد فى حياتى .. لا بطلب منك تتكلم زيادة ولا تلوك معايا فى التليفون ولا حتى تسهر بليل عشان تكلمنى لان ده المفروض .. مش عيزاك تعمل حاجة وانت مش حاسسها .. يوم متحس انك عايز تشوفنى كلمنى وقولى عايز اشوفك .. لكن متشوفنيش عشان انت عارف انى جاية انهارده .. حتاخد من وقت راحتك ساعة فأسهر وكلمني .. لكن متكلمنيش عشان كان لازم ترد على اخر رسالة بعتهالك ..
_ انا عمرى محسيت انك تقيلة عليا ..
_ ولا حتحس بده .. عارف ليه ؟
_ ليه ..؟
_ عشان انا عشقتك من قبل مقرب منك .. وانت عينيك كانت واخدة بالها مني من قبل موصل لقلبك ..
او يمكن عشان الحاجة اللى مش مضمونة بتفضل محافظة على الهالة بتاعتها ..
عشان الصراحة بتخلينا ناخد بالنا ..
عشان انا متأكدة انك اول مرة تكون كده ..
عشان عينيك وهى بتتكلم قُصادى مبتكذبش ..
عشان ايدى اللى بتترعش دى ..
ومُحولاتك إنك تداري ابتسامتك وانت بتقرالي ..
عشان حاجات كتير بيني وبينك مش لازم اكررها 
لانها المفروض بتتحس ..!
_ وديماً بعشق نظرتك ليا، وبعشقك ومعرفش ليه ..
وحاسس اني سامحلك تعدي كتير جوايا ومش متضايق من ده ..
قُربك مني مُريح ..
خلي طيفك ديماً حواليا ..
_ وجنانك وكلامك وملامحك اللى مش حلاقى زيهم بعد ما طلعت من نفوخى ..
بعد ما كُنت حاسة إن اللى بحلم بيه ده مبقاش موجود ..
فأكيد أكيد يعني مش حفرط فيك بسهولة ..
_ لو كنتي خايفة من البُعد فبقولك مقدرش ابعد عنك انتى بالذات ..
_ ولو كُنت خايف اكتب لغيرك فبقولك الكتابة لو مش ليك مش لازماني ..~

مشهد 2

_ مُختفي فين بقالك كام يوم ..؟
_ مخنوق شوية ..
_ وايه كُل السجاير دى .. والشباك مقفول ليه ؟
_ ....
بتروح تفتح الشباك
_ متفتحيش حاجة ..
_ ايه اللى انت فيه ده ..؟
_ مالى ؟
_ عينيك حمرا .. طفايتك مليانة سجاير تقول إنك شربت بتاع اربع علب .. اوضتك مقفولة وضلمة ويدوب شايفة كف ايدى من نور الصالة اللى برا ..
_ عايزة ايه ..؟
_ عيزاك ترجع تاني ..
_ وحد قالك انى توهت ..؟
_ عينك ..
_ ....
_ عارف اول مرة اتكلمنا فيها وقولتلك إني مش عيزاك تجيلي يوم وتقولي انا بحبك .. واستغربت وقولتلى لو افترضنا ان حبيتك اعمل ايه .. وقولتلك كررها فى سرك كتير قُدامى عشان تبان فى عينيك وسعتها بس ححسها .. عشان الحُب مش كلمة مسموعة ..
وقولتلك إنقلي ذبذبات قلبك رغم بُعد جسمك عني ..
_ فاكر ..
_ ولما انت فاكر بتسأل السؤال ده ليه هاه ..؟
بتحدفه بالمخدة
_ عايزة ايه انتى دلوقتى ؟
_ عيزاك تقوم تستحمى وننزل ناكل سمك ..
_ مش عايز ..
_ خلاص ناكل رز بلبن
بيبصلها بنص عين ورافع حاجبه اليمين
_ خلاص نشرب قصب ..
_ بقول مش نازل سبيني ..
_ خلاص حنزل انا ..
_ حتمشي ..؟
_ لا طبعاً ..
_ اومال حتنزلي تتهوي شويه ؟
_ لا حجيب خضار مسلوق عقاب ليك وارجع ناكل سوا .. 
وحشوف فيلم كويس يعدل المود بتاعك ده .. وحنضف اوضتك القذرة دى سوا
_ اوضتى انا قذرة ؟
_ امممم طب معفنة ؟
_ برا يا * بيقول اسمها*
_ ماشي .. حروح برا شوية ورجعالك ..
_ جبيلي سجاير ..
_ بس يا حبيبي .. مفيش الحاجات دى انهارده .. اختشي على دمك بقه
بتنزل تروح تجيب الحاجة ..
بيبتسم هو ويفتح شباك اوضته يبُص عليها وهى نازلة ..