غِيَاب

واقفة على باب شقته ..
لابسة جاكت اسود تقيل ..
وهو فاتح الباب لابس تيشرت ابيض وشورت
_ فينك بقالك كام يوم ..
_ في الدنيا ..
_ وانا مش في الدنيا دي ..
_ مانتى اهو ..
_ انا اللي جاية، انت فين بقه ؟
_ خشي طيب الاول ..
بيدخل وتدخل وراه ..
بتقفل الباب ..
_ نور النور انا مش شايفة حاجة ..
بينور اهدا ضوء في الشقة ..
قاعد على الكنبة ..
بتيجى تقعد على الكرسي اللى جمبه ..
_ انا حسافر ..
بيبصلها بطرف عنيه ..
_ مبروك..
_ مش بقولك عشان تقولي مبروك ..
_ اومال اقولك ايه ..؟
_ انت ايه الهدوء اللي بتتكلم بيه ده ..؟
هو انا موحشتكش ؟
_ وحشتينى ..
بتقرب نحيته ..
_ ومبتقولش ليه ؟، مجربتش تتصل ليه، او حتى تبعتلى على الإيميل ..!
_ مشغول ..
_ امممم .. انا مسافرة كمان يومين ..
مش بيرد وباصص قدامه ..
_ تيجي معايا ..؟
بيوجه دماغه نحيتها ..
بيضحك ضحكة استهزاء ..
_ هي رحلة ..؟
_ لا مش رحلة، بس احنا ممكن نخليها رحلة ..
تعالا نروح هناك سوا .. نشتغل ونتفسح ونغير جو وناس ..
حنرجع مرتاحين اكيد ..
_ اتكلمي عن نفسك ..
_ يعنى ايه ..؟
_ يعنى انتي اختارتي تسافري .. اختارتي تيجي .. اختارتي كمان تاخديني معاكي ..
وكمان بتختاري اننا حنتبسط هناك ..!
بتحس إن جواها كتير وشيلاه وهو مِطّنش اي حاجة
وكمان بيتهمها انها مبتفكرش فيه
_ عشان انا لوحدي ..
بختار كل حاجة مع نفسي ..
حتى لما بقولك تعالا نتغدا واسألك اعملك ايه ؟
ردك ديماً عليا "اى حاجة" ..
شغلك وعلى راسي من فوق ..
انا كمان بحب الشُغل ..
وبحبك..!
انت بقه .. حط ورا كلامي ده مليون نقطة وعلامة تعجب ..
بيبصلها هو ..
_ امممم
_ ده الرد ..!
_ بحب شكلك وانتى مُنفعلة ..
بتاخد شنطتها من جمبها وتقوم ..
_ ده استفزاز ..
بيقوم وراها ..
_ استني لحظة مُمكن ..
بتقف وتلف تبصله عشان نبرة صوته متغيرة ..
_ انا كُنت بحاول افكر فيكي ..
بعدت عن الشُغل ..
رغم كُل اللي في حياتي انتى لسه موجودة ..
كل ده ليه ..!
انا متعودتش حد يفضل جمبي ..
حتى لو بتحبينى مش سبب برضو ..
_ امممم ..
_ ده الرد ..
_ بحب شكلك وانت بتفتكر اللى كان حاصل معاك ..
بيلف نحية الكنبة وبيمشي ..
وبيحاول يقلد صوتها ..
_ ده استفزاز ..
بتضحك هي ..
_ متتريقش على صوتي هاه ..
_ تعالي اقعدي ..
بتروح تقعد جمبه ..
بيمسك ايديها ..
_ انا محتاجلك اكتر من اي وقت ..
اول مرة احس إني حقيقي محتاج لحضن ..
محتاج نور في الشقة او دوشة جمبي تغطي على الهدوء اللي جوايا ..
ممكن تخترقي السور اللي انا بانيه بقاله كام سنة حواليا وتخشي ..
عنيها بتلمع من كلامه ..
لأول مرة تحس انه عايزها بجد من جواه ..
بكامل وعييه ..!
_ اممم .. بس في شرط صغير ..
_ والله ..! شرط ؟
_ ممكن تسمع ..؟
_ قولي ..
_ لما اكسر السور ده ..
وادخل انا ..
نبنيه سوا ..
ونعمله ضد الكسر ..
لإنك لو حاولت تكسر عشان تخرج ..
حاجي انا واكسر دماغك فيه ..
_ ايه الرومانسية الاوفر دي ..
قلبي حيقف ..
بتضحك هي ..
الكلام بينهم بقه حلو ..
الكاميرا بتبعد ..
الشقة ضلمة والنور الهادى جمبهم وبس ..
ضحكتها واضحكته ..
هزار بينهم ..
وبس ..