صورة من الحاضر

والظروف مش في صالحي ليك ..
الكلام قُليل ..
واللُقا بقى مُستحيل ..
ولإن كُل حاجة بتحصل بسبب ولسبب ..
انا شايفة ان في اجابة لسه مظهرتش لكمية الاسئلة اللي عمالة تحاصرني ..
الناس اللي بقابلها ..
والناس المُهتمة ..
والناس اللي بتقول كلمة حلوة ليا ..
ليهم في قلبي معزة خاصة عشان بيفرحوني ..
بس كلامك القُليل ونظرتك التايهة وكلمة " مش عارف " بعد سرحان طويل ..
لساهم في دماغي ..!
سذاجة بقى او طفولة ..
سميها زي ما تسميها ..
مش فارقة الأسامي معايا ..
اللي فارق صورتك اللي بكتبلها دلوقت ..
وشكلك وانت اصغر من دلوقت ..
والابتسامة اللي طالعة من القلب منك وباين لمعتها في عينيك ..
والجوابات اللي بقت متشالة في الدرج بتاعي ومش حتوصلك ..
عشان صندوقك اتملى ..
وعرفت ده من آخر مرة اتركنت فيها رسالتي على الجمب ..
مش زعلانة ..
انا حقيقي عيشت جمبك بكامل وعيّ ..
بكامل حُريتي وعشقي لتفاصيلك ..
بس المهم ديماً ليه الأهم ..
والاهم إن الكتابة لساها بتتمحور على اللي جوايا ليك ..!